حقق حلمك “بجد” – المرحلة التانية

البوست اللي فات كلمناكم عن التراستيوس Alphas ..بس هنفكركم بيهم تاني :) دول ناس عندهم إيجابية وعايزين يعملوا فرق في المجتمع حواليهم…واحنا كان لينا شرف إنهم بيوظفوا جزء من ايجابيتهم في صورة آراء على تراستيوس تفيد ناس كتير بانها توفر عليهم مجهود ووقت البحث عن أحسن منتج أو خدمة ليهم. عشان كده احنا قررنا يكون لينا دور في مساعدتهم بأي طريقة ممكنة على زيادة الايجابية دي وتوظيفها صح!

لو عايز تعرف أكتر ادخل على البوست ده: http://blog.trustious.com/?p=652

 ******

واحدة من الحاجات اللي بتفرق  الناس الناجحة من الناس العادية …غير العزيمة والصبر…هي إنك تعرف امتى تبدأ تتحرك!

Getting_Started

مصدر الصورة: http://bit.ly/13AkEEV

بعد أول session عملناها للتراستيوس Alphas عن ال Business Model Session اقترحنا عليهم يبدأوا يشتغلوا على ال Business Model Canvas  بتاعتهم – اللي هتساعدهم يعملوا خطة لبدء المشروع – وييجوا بعد أسبوعين نناقشهم فيها ونديهم أفكار واقتراحات. أفكار زي إيه؟ زي هل تفاصيل المنتج والخدمة مناسبة فعلا للسوق؟ هل طريقة توصيلها هي أسهل طريقة؟ هل الميزانية المقترحة هتكفي؟…الخ. لما تسمع حاجة زي كده ممكن تتخيل إن الناس معظمها “هتكسل” أو “هتأجل” أو ممكن مش هتهتم أصلا! الحقيقة إن اللي حصل كان عكس كده تماماً!

المرة دي جالنا أكتر من 5 مشاريع، منهم ناس بالفعل معاهم فريق عمل ومستعدين يبدأوا. ده غير الناس اللي كانت عملت ال canvas بس مقدرتش تيجي لظروف خارجة عن إرادتها.

كل واحد من الشباب والبنات شرح فكرة المشروع بتاعه: جاتله الفكرة إزاي وإيه المشكلة اللي بتواجه المجتمع والمشروع هيكون الحل ليها…وهكذا. وبعدين حكولنا عن تفاصيل إزاي هيبدأوا في تنفيذ المشروع على أساس اللي عرفوه في ال session اللي قبلها.

Screen Shot 2013-07-02 at 1.41.20 PM

أفكار هتغير كتير في المجتمع

الجميل إن مفيش ولا فكرة كانت زي التانية…أو قريبة منها حتى. كان فيه حد بيفكر في مشروع  يمد بيه الكهرباء لمناطق عشوائية مُعينة مستعيناً بمجهودات من الناس نفسها في المناطق المحيطة مش من الحكومة. ده كان من أكتر المشاريع المتكاملة ما شاء الله…واضح إن فيه مجهود كبير اتعمل في تحضيره. والأجمل إنه حمِّس كل الحاضرين وخلَّاهم يشاركوا بآرائهم في المشروع وأفكارهم أضافت للفكرة كتير… بالذات إنه حاجة بتمسّ كل المصريين مش بس اللي عايشين في عشوائيات.

مشروع تاني كان عبارة عن application على الموبايل بتساعد البنات يبعدوا عن المناطق المعروف إن فيها تحرش… وبيعتمد في كده على كل مستخدمي ال application نفسها واللي معظمهم غالبا هيكون من فتيات ونساء مصر العظيمات :)

وكان فيه مشاريع تانية مختلفة منها design house  للبس البنات بيجمع بين الموضة والمظهر الإسلامي المحتشم. ومشروع تاني لبيع قطع غيار العربيات على الإنترنت واللي احتمال يتحول لخدمة ميكانيكا متكاملة  تجيلك لمكان عربيتك :)) وده نتيجة لإقتراحات كتيرة جت لصُحاب المشروع من فريق تراستيوس وباقي الحاضرين من الشباب. وغيرها من المشاريع المختلفة اللي لما تنجح هتفرق قوي في حياتنا!

Screen Shot 2013-07-02 at 1.43.49 PM

أكتر حاجة عجبتنا في ال session إن الناس ماكانوش حاسَّين إنهم في محاضرة. كان كل واحد بيقول رأيه في المشاريع التانية وأصحاب المشروع بيقبلوا الاقتراحات ويرحبوا بيها جدا…حتى في وقت ال break كانت الناس بتتبادل الآراء والأفكار والنصايح. كانت روح  حلوة جداً ما شاء الله :)

المرحلة اللي جاية هنعمل إن شاء الله حاجتين

أول حاجة: هنقعد مع صاحب كل مشروع لوحده  لو كان محتاج لمساعدة في تفاصيل المشروع…نشاركه خبرتنا المتواضعة في عمل شركة وإيه الحاجات اللي ممكن يتجنبها أو يعملها فتسهل عليه خطوات كتير…الخ.

والحاجة التانية إننا هنحاول نعمل محاضرات تخصصة عن جوانب المشروع المختلفة. يعني إيه؟ يعني محاضرة عن إزاي تجمع رأس مال كافي وإزاي تعمل ميزانية وتدير العائد بتاعك وتكلفتك. محاضرة تانية عن إزاي تسوق للمنتج بتاعك وبالذات في أول مرحلة …محاضرة تانية بتكلم عن إدارة الموارد البشرية…وهكذا.

مستعدين نعمل حاجات كتير عشان نشوف بلدنا بتتحسن على ايدين ناس فعلا عايزة تحسنها :)

وإنت كمان ممكن تبقي واحد من الناس دول، ال Alphas… ازاي؟

  • ادخل اعمل أكاونت على تراستيوس.
  • اكتب أرائك في حاجات جربتها وعجبتك (أو معجبتكش).
  • ولو كنت جامد هندور عليك وندخلك على الجروب وتبقى واحد من عيلة تراستيوس ;)

www.trustious.com