رأيك بيفرق في الجامعة

زمارة عالية و بلالين نازلة من السما…هرج ومرج وطلبة وبنات وشباب واقفين مذهولين!! إيه البلالين دي؟ مين اللي رماها من فوق؟ ثواني وكله ابتدى يتحرك مرة واحدة …كل واحد عايز ياخد بالونة، يفهم إيه سرها و جاية منين و جايبة معاها إيه. بعد شوية ناس كتير أخذت بلالين والشوكولاتة إلي جوا البالونة وقعدِت  تقرا إل flyer المشبوك فيها و تشاركها مع صُحابها. و من هنا ابتدت حملة رأيك بيفرق في الجامعة الألمانية والجامعة الأمريكية والجامعة البريطانية…

البوث كان جاهز يرُد على أسئلة كل الناس على الحملة وشبابنا من الأنشطة الطلابية المختلفة (clubs) المتطوعين معانا ساعدونا نتكلم مع الناس في الجامعات التلاتة ونشرح لهم فكرة الحملة وتراستيوس نفسه من خلال ال fliers وغيرها من الحاجات المجنونة اللي بتشد الناس :))

في GUC، اليوم التاني كان مسيرة في وسط الجامعة كلها، تقدر تقول مظاهرة. بس مش بتهتف ضد حد، ولا مع حد. بتنادي بس بإن كل واحد لازم يقول رأيه و مايسيبوش لنفسه. ليه؟ عشان كل واحد رأيه بيفرق. مش بس مع صحابه، لأ مع ناس تانية كتير وكمان مع ناس محتاجة.

44783_10151607726842359_1804251926_n

المسيرة دي حمست الناس جداً الناس وشجعتهم ييجوا يسألونا  إحنا بنتكلم عن إيه و إيه الرسالة اللي احنا عايزين نوصلها  بالضبط  من كلامنا  ده. أحلى حاجة إننا لما كنا بنشرح للناس في السريع واحنا ماشيين كانوا بيتحمسوا ويشيلوا يُفط هم كمان ويمشوا يهتفوا معانا.  

DSC_0244

روح الناس شجعتنا إن إحنا ننتشر أكتر و نوزع fliers أكتر و نتكلم مع الشباب أكتر…الحماس كان شديد الحمد لله والمتطوعين كانوا بيزيدوا مع كل يوم.. و ده خلانا في أخر يوم نقدر نعمل  سلسلة بشرية طويلة من أول الجامعة لآخرها بتدي رسايل مختلفة للناس زي “رأيك = حلم كبير، إبني مستقبل أسرة برأيك، رأيك مش بس كلام ده  مشروع لواحد غلبان” وغيرها. كل واحد أو إتنين في السلسلة البشرية كان ماسك لوحة صغيرة عليها رسالة من دول بتشجع الناس على الإشتراك في الحملة.

15180_10151607722192359_1590262488_n

في AUC الموضوع كان مختلف شوية… بعد حملة البلالين اتفقنا مع الجامعة إنها تغير ال  wallpapers بتاعت كل الكمبيوترات في المكتبة للوجو “رأيك بيفرق” و ده خلا ناس كتير تيجي تدور علينا في البلازا عشان يعرفوا إيه موضوع  رأيك بـيفرق ده. وكالعادة كنا مستنينهم في البوث عشان نقولهم على الحملة العظيمة بتاعتنا. بس المفاجأة  الجامدة كانت في تالت يوم في AUC !!

Freeze

شوية من شباب تراستيوس مع شوية من AYB عملوا مشهد صامت غير متحرك! طبعاً كل الناس كانت ملمومة حوليهم عايزين يعرفوا الناس دي بتعمل إيه… والإجابة بعد شوية “suspense” كانت عند الناس اللي واقفين في البوث….شرحنا لهم ببساطة إن كل اللي هما شايفينه ده بيعبر عن تراستيوس نفسه. يعني لما تكون بتقرا كتاب وعاجبك تدخل تقول رأيك فيه على تراستيوس، لما تدخل مطعم وأكله يعجبك تدخل تقول رأيك على تراستيوس، أو لما تجيب موبايل جديد و تحس إن هو مش أحسن حاجة…لازم برضو تدخل تقول رأيك على تراستيوس...من الاخر أي حاجة عايز تشجع صحابك عليها أو تحذر صحابك منها …من أكل و شرب لتكنولوجيا و جيمات و محلات لبس وغيرهم ، كله هتقدر تعمله على تراستيوس.

بس أحلى حاجة حصلت فعلا في الجامعة الأمريكية كانت لما مجموعة صغيرة من طلبة المدارس كانوا موجودين في الجامعة يومها و اتحمسوا جدا للفكرة لما حكينا لهم عليها ووقفوا ساعدونا في نشر فكرة الحملة والكلام مع الناس. بصراحة كنّا فخورين جدا بالحماس بتاعهم رغم إن سنهم صغير :))

auc freeze after

أما في BUE فحماس المتطوعين بتوعنا كان جامد جدا. كانو بييجوا من بدري عشان يساعدوا في تحضير البوث و يشتغلوا معانا في ال break بتاعهم كمان عشان الرسالة بتاعتنا تقدر تروح لناس كتير وكمان كانوا بيشجعوا الناس ييجوا يشتروا تيشيرتات عشان التبرعات بتاعتها تروح للحملة. روح الناس هناك كانت حلوة قوي وكانوا بيجوا يسألونا إزاي يقدروا يشاركوا في الحملة وإزاي يقدروا يساعدوا.

 IMG_4303

من الآخر روح الطلاب وحماسهم في الجامعات التلاتة كانوا بداية مشجعة جدا لحملة رأيك بيفرق وخلتنا نكمل بقيت الحملة باقبال وتفاؤل كبير. احنا بنتمنا نلاقي نفس الروح دي في كل الجامعات اللي هنروحها في المرحلة اللي جاية ان شاء الله.